Morís eth conductor der autobús de Togo

   Eth conductor der autobús dera seleccion de Togo a mòrt dempús er atac deth quau an estat victimes ar entrar en territòri angolès, escenari a partir de dimenge que ven dera Copa Àfrica, e quate persones mès an estat ferides, segontes un oficiau togolès.

   "Eth conductor angolès a mòrt ar atac", a afirmat un portavotz deth ministre d'Espòrts de Togo, qu'a precisat qu'er atac a agut lòc en parçan de Cabinda. Ath delà, a afirmat qu'es ferits son dus futbolistes e dus mètges.

   Eth portavotz a reconeishut que bèri uns des ferits an agut d'èster evacuats per seguir un tractament, maugrat que no an estat facilitadi cap de tipe de detalhs ne era gravetat des ferides des futbolistes.

   Mentrestant, eth Manchester City, club en què milita eth togolès Emmanuel Adebayor, a confirmat a través dera sua pagina wèb (www.mcfc.co.uk) qu'eth davanter no a cap de dany, dempús auer mantengut ua convèrsa damb Adebayor.

   Eth club anglés volec mostrar eth sòn supòrt as afectadi e enviar-les eth sòn desir que se recupèren el més aviat possible. Eth conjunt de Manchester a afirmat que se trape en contacte damb era Federacion Anglesa de fotbòl per se de cas se coneishen mès detalhs dera situacion.